My Picture

welcome 2 my world

more about me , للإستفسار »



تحديث: ياجماعه سوري للي مالحقو شافو الفديو لانهم سحبوه
واصلن اترفع عليهم قضيه ... 







(((مرااااا غير *_*)))
طيب انا رح اعلق على كل جزء من الفديو
ورح نبدأ بالبنت
بالنسبه للعبايات الملونه الخارجه عن اطار اللون الاسود هادي فكرتها مبلوعه بس في حدووووووددد
انا اقلكم متى ممكن البني ادميه (المسلمه)تلبس العبايه دي
اول شي لمن تكون سيارتهم جوة بيتهم يعني تطلع من البيت تخش على السياره ومافي ولا مخلق ماشافها
تاني شي تكون رايحه عزيمه عند ناس في بيتهم وبرضو ماتكون الهرجا فيها انها تمر على صف رجال او انها تقطع سكه
هادي انا اشوفها الحالات اللي ممكن الوحدا تلبس فيها عبايه ملونه زي كدا
اما بالنسبه انها تمشيبها فكل حته حتى دوار الدراجه تلطلعو بيها دي الساعه الشي يتعدى الحدود الحمرا
الحجاب الحكمه منو ايش؟ الله عز وجل يقول {يَا أَيُّهَا النَّبِيُّ قُل لِّأَزْوَاجِكَ وَبَنَاتِكَ وَنِسَاء الْمُؤْمِنِينَ يُدْنِينَ عَلَيْهِنَّ مِن جَلَابِيبِهِنَّ ذَلِكَ أَدْنَى أَن يُعْرَفْنَ فَلَا يُؤْذَيْنَ وَكَانَ اللَّهُ غَفُوراً رَّحِيماً }الأحزاب59 الغرض من الحجاب منع افتتان الرجال بجسم المرأه
وهادي بنطلونها شافوه كل اللي في الدوار ووجهها ماشالله 
يعني انا ازا مررررررا ممكن البس عبايه زي كدا خارج المملكه العربيه السعوديه 
لانو هنا ماينفع تجي تلبس زي كدا وتقول انا رح أعود الناس على المنظر دا !! هادي امريكا فيها التبلد دا بس مو هنا
يعني المهم الحجاب الغرض منو الستر زي ماقال بياع العماري الحجاب الاسود الغرض منو الستره وطبعن هيا ماعجبها الموضوع
وانا حاقلكم ليش ماعجبها:
اول شي البنت بطبعها تحب الشياكه ودي اتشيكت مرا وقت طويل ومارح تجي في المرحله دي وتلبس فجأه عبايه سودا لانها تشوفها مو قد مقامها تاني شي البنت بتسوي اللي على هواها بسبب انو امها تاركتلها المجال وزي ماالبنت اعترفت وقات انو مامتها ربتها وقالتلها انتي دحين تعرفي الغلط من الصح يلا سوي اللي تشوفيه صح ..... وبالتالي لكم الحريه انكم تتخيلو ايش حيسير !!
اما بالنسبه للدراجه هادا دليل عاشر على انو البنت بتمشي على هواها لانو لو كان في كنترول عليها كان ماتخيلت نفسها في لاس فيقاس
ومين مايحب الفلته وبالزات بالدراجه ؟؟ يعني مافي احلى انو الواحد يمشي في الحواري بالدراجه و انا لو جيت اعيش حياتي وامشي على هوايا كان سويت أخص من كدا بالزات وانا انسانه جدا متهوره
بس ياناس في شي اسمو كنترول يعني مو كل شي في (نفسي) يعني لازم اعملو
ومافي شي اسمو الحياه حنعيشها مره .. سوري دا مو كلام ناس عقال ! واللي يقول كدا يعرف انو بدأت عقيدتو تنهار ولازم ينتبي على نفسو يعني رسووول الله عليه الصلاة والسلام  اللي هوا معلم الأمه وقدوتنا كان يدعي لنفسو :(اللهم يامقلب القلوب ثبت قلبي على دينك) يعني حتى الرسول كان يخاف على عقيدتو واحنا فزمن مليااااااان فتن المفروض نكون مفجوعين على عقيدتنا كمان 

المهم هادا بالنسبه للبنت
اما بالنسبه للولد اللي للأسف طاااافح تربية شغالات ووصل بيه الجهل العنييييييف انو يقول ايش فيها لو قابلت حبيبتي في مكان عام؟؟؟؟
يعني استغفر الله انا مني داريه وهوا بيصلي ايش بيقول لانو مستحيل بني ادم يقرى قرآن ويصلي ومايعرف ايش الحكم عن الجلوس مع اجنبيه ولا الحبيبه ماتسير اجنبيه ؟؟؟؟؟؟ وغير كدا لازم لمن حيشوفها حيصافحها وأكييييييد مايعرف انو  الشي دا حرام
وطبعن حيقول وي ايش فيها اصافحها ياالله انتوو معقديييين *_*
وللأسف بيقول انو مايقدر يعيش خارج المملكه وانو مكانو هنا والخ الخ
وانا صراحه اشوف انو دا ماينتمي لهنا ابدا لو يروح يعيش برا ابركلو وحينسجم معاهم وديك الساعه مارح يحتاج يسأل سؤال غبي زي اللي سألو
ااااااخ الله يهديه بس

ونجي للشله الخورافيــــــــــــــــه
اول شي بما اننا بشر ربنا حط فينا عقول وخلقنا على فطرة الاسلام انتو تشوفو انو لمن الواحد يكون بيغني ومو أي غنى لااا (رووك) ويكون بيزعق وداخل فوسط موود الزعيق والجنان حق الروك وفجاه يروح يتوضى ويصلي ......... ايش رأيكم بالله؟؟
اصلن اتحدى على مليون ريال لو قدر يقرى الفاتحه والاغنيه مهي فراسو
لانو القرآن والاغاني في الراس لايجتمعان فما بالكم بالصلاه + القرآن +الميووزك
ولا لمن راحو البحرين وسوو اللي فراسهم وداك يقول انشالله انشالله حنكمل الحفله
طبعن بالعقل لمن حنشوف شي زي كدا رح نتأكد انو الناس دول عمرهم فحياتهم ماعرفو ايش الصح من الغلط
واكبر دليل الأم الفلاويه اللي خشت و(صافحت)اصحاب ولدها وماقالتلهم غير انتبو على نفسكم وهيا بتضحك كمان ......
يعني الدنيا ســــــــــــــــــــــــآآآآآحبه
وجايبنلي هادول الناس (الرااقيين) اللي يبغو يحررو الشباب و(يحضروهم) ... امحق حضاره لو كانت بالشكل دا
والله يكون اللي عايش في الباديه أرقى مننا بمليون مره لو كنا حنمشي على دا الحال

أول شي ام تي في قناه جيه من عند اليهود عاد لمن يشوفو شلة الناس الواااااوو دول جيين بيعملو فديو عن التحضر والتطوراكيييد رح يساندوهم وينشرو الفديو حقهم ..ليش؟ عشان يزيدو مستوى التخلف في البلد وهوا دا اللي اليهود يبغوه يسير
طبعن حتشوفو قد ايش دول رح يعظموهم ويكافئوهم ويعرضو الشي على الملئ  وتقدرو تتخيلو ايش حيسير في مجتمعنا بعدين

طبعن انا بعد ماتفرجت على الفديو جاتني جميع انواع المشاعر اللي ممكن احد يشعرها 
وكان نفسي ابكي بصوت عالي على المستوى الانحطاطي اللي الناس وصلولو
طبعن كل شي في الحياه لو وجه سلبي ووجه ايجابي وهادول اللي في الفديو من الوجه السلبي البئيس
ولسا انا عندي امل في الوجه الايجابي
واتزكرت الاندلس اللي هما ماقدرو يستولو عليها من بعد العلم والثقافه والازدهار اللي وصلولو غير بسبب ضغف ايمان شبابها
الولد كان بيبكي على حبيبتو لانها سابتو قامو احتلو الاندلس

يعني مانقدر نقول غير الله يهدي وينور عقول مجتمعنا بكبرو
وكل واحد أمو ربتو بليييييييزز لايضيع التربيه دي لانها دي اليومين كنز وياريت يوصل التربيه دي لاحفاد احفادو عشين نقدر نجيب جيل غير عن جيل الشغالات دا 


وزي ماقول دايمنا
يالطيــــــــــــــف وياربي لا تبلانا

=(
Read more ...
نظريتي ... شعب سعودي ...



زي ماوعدتكم رح اطرح موضوعي الاول ورح يكون بعنوان نظريتي عن الشعب السعودي
أول شي رح ابدأ اوضح بعض النقاط المهمه قبل ماأبدا عشان ماترك المجال لأحد يفهم غلط

أول نقطه هيا لمن نقول شعب سعودي ازن انا اقصد كل من هو داخل المملكه العربيه السعوديه الآن وبغض النظر عن الجنسيه لانو كما يقول المثل ..من عاشر قوما 40 يوما سار منهم ..

تاني نقطه انا واحده من الشعب السعودي اذن انا ماستبعد نفسي منهم ابدا ولاكن انا انسانه عايشه وسطهم باشوف جميع سلبياتهم وايجابياتهم ومابتعجبني بعض تصرفاتهم ازن انا مارح اجلس اتفرج على اللي بيحصل حوليا والحمدلله ربي اعطاني لسان عشان اقول اللي فقلبي ويد تكتب اللي فقلبي وانا لازم أعلق على اللي بيحصل عشان لا أكون شيطان أخرس

تالت نقطه :   كل شي في الحياه دي ليه مساوئ وايجابيات وانا اليوم رح اتكلم عن المساوء وانشالله فموضوع تاني رح اتكلم عن الايجابيات عشان تعطيني أمل انو لسا الدنيا بخير (تحليه بعد الاكل)

رابع نقطه:  اذا انتا\انتي  واحد من اللي غير مذكورين في القائمه التاليه فأنا اقولكم كيـــــــــــب قوين والله يفتح عليكم واذا عجبتكم نظريتي حاولو تنشروها في أوساطكم الاجتماعيه لعل وعسى يسير خير


بسم الله الرحمن الرحيم

انشالله تكون المقدمه كافيه ووافيه عشين نبدأ في صلب الموضوع
من يوم مافتحت عيني على الحياه ودا الشي بيحصل ولاكن انا دوبي بدأت استوعب اللي بيحصل حوليا
ألا وهو الشعب السعودي يعني الناس اللي من حوليا يعني اللي باشوفهم كل يوم وباتعامل معاهم لاحظت عليهم حركات او تصرفات هما نفسهم ماتعجبهم ولاكنهم للأسف زي اللي مهم واعيين على نفسهم ورح ابدأ اذكر جميييع التصرفات السيئه او العادات بالاحرى وبعد كدا رح نكمل
اول شي:
لمن تطلب من زميلك أي طلب بسيييط مثلا تقلو (باللهي ناولني الشي الفلاني يقلك ييييييه مشواار ) دي الحركه منتشره بشكل مفجع وانا اقصد بكلمة مفجع انو جميع الناس من حوليا سارو كسلانين بالشكل دا المشكله في الموضوع انهم يموتو في نكت شعب من الاعراق العربيه ودايما يوصفوهم بالكسل ويجلسو يضحكو عليهم في النكت والظاهر اللي بيحصل انو ربي بيبتليهم باللي اتريقو عليه.

تاني شي:
تحصل انو فيوم من الايام تنزنق وتلاقي نفسك تحتاج للمساعده فتطلب من احد خلينا نقول زميلك في الدراسه انو يساعدك في شي مثلا قلتلو امسكلي الورق دا شويا وأجي ولمن تجي تلاقي الورق في الارض والناس دعسو فوقو ولمن تسألو يقلك اوه نسيتو ويجي ماشي ولا كأنو سار شي ودي عاد ياااااامكترها وتدل على انهم ناس مستحيييل احد يعتمد عليهم باللهي دول كيف حيتجوزو؟؟ هما هدولا الناس اللي جايبينلنا جيل تربية الشغالات اللي نلاقي الولد من اول مافتح عينو على الدنيا راح على الردسي وأمو لو كانت داريه عن نفسها بالتالي ابسط ماحتسويه انها حترسل معاه الشغاله اللي هيا حتروح تدشر مع السواق والولد يصيع مع اصحابو ويبدؤو يتعلمو كل ماهو مفيد في عالم القيرلز عشين يكونو ناضجين بما فيه الكفايه ويكبرو الحلوين ويتجوزو ويكملو دورة حياة جيل الشغالات وبكدا نرتقي بمجتمعنا *_*

3:
الكدب . سارو الناس يكدبو عيني عينك وسار زي سلام عليكم ومرررررا عادي واللي مايعرف يكدب يقولو عنو انو انسان غير ناجح في الحياه وشي اساسي من حياتهم الكدب اصلن لو ماكدب كان مانجح في اختبار الفيزيا ولو ماكدب كان مانفك من مشكله سواها ودبس فيها غيرو ولو ماكدب كان ما اخد مصروفو الشهري ولو ماكدب كان ................ الخ  وتتعد اسباب الكدب اللي مال امها داعي
الكدب يجوز في حاله وحده بس لمن الشي يكون في ارجاع زوجين لعلاقتهم  وعندكم اكبر مثال على الكدب المنتشر بشكل خرافي بيننا الاولاد بشكل خاص والتيينز بشكل عام وانا باتكلم على الفئه اللي (تكلم) هادولا مافي كلمه وحده ينطقوها غير اشكال وانواع الكدب وانا سيارتي مدري وت وبابا مدير الشركه الفلانيه وفي النهايه يكون ساكن في الكرنتينا 

4:
الفئه اللي اتكلمنا عنها فوق الا وهيا فئة التيينز اللي (يكلمو) واقصد يكلمو يعني يتعرفو على الجنس الآخر ويكونو علاقات ويحسسو نفسهم انهم في لاس فيقاس ويروحو مع بعض ويجو لدرجة الوحده نقولها امس شفتك مع اخوكي الللي كل يوم ياخدك من المدرسا تقول اهااا لالا دا البوي فرند تبعي وبكل ألاطه وسار عندهم روحة الشقق كماان زي سلام عليكم وعلى قولة دولاك الشرهه مو عليكم الشرهه على اللي يجبلكم تلفزيون في البيت ويفرجكم على افلام 
والله سرت احيانا اعذر الملتزمين عن منعهم التلفزيون في البيت هيا صح الطريقا دي مارح تمنع فساد الجيل لانو الجيل ممكن يفسد بملايين الطرق ولاكنهم معذورين في خوفهم على اولادهم لانو شايفيين بعينهم الناس يتفرجو افلام من هنا ويخرجو يطبقوها في الحياه من هنا وبكدا ماشالله خرجلنا جيل لايحسد على ماهو عليه من الشطاره والفظاعا والخبره في التديييت وتزبيط الاوادم والقدره الفائقه على الترقييم لدرجة يستحقو انهم يتسجلو في موسوعة قينيس لأفضل مرقمين على وجه الارض

5:
معد سار في أحد يطبق دينو صح واللي بيطبقو صح يقولو عنو (مطوع) ورح نتكلم عن الناس دول في موضوع كامل تاني بإذن الله بس دحين خلينا في اللي احنا فيه ... الناس لمن جات تتفرج لقت مين؟؟ (((أحمد الشقيري)))ودا انسان خورافي انا ماأنكر ولاكن لو بعض الملاحظات اللي قليل من الناس لاحظوها يعني المهم تجي البنت لابسه عباية من اللي هيا وديك الاساور والأخراص اللي كأنها نجف بيت تيتا والمناكير الفوشي والبيبي بلون المناكير وداك الكعب الشبر .....الخ فين رايحه؟؟؟ رايحه محاضره للشقيري
طبعا مامتها فقمة السعاده انو بنتها رايحه تسمع كلمتين عن الرسول !! طب ياناس ياهوووو هادا الشي صح؟
اااخ المهم توصلكم المعلومه


6:
الناس اللي تجلس تسب الحكومه وماعندهم شغله غير يصحو وهما بيشتكو وينامو وهما بيشتكو وتلاقو دول اللي بيشتكو عن الحكومه والاوضاع السياسيه اللي مال أمهم دخل بيها فيهم نفس الصفات اللي انا ذكرتها فوق وبالتالي فأي شي بيجيهم في الحياه لاتحزنو عليهم عارفين ليش؟ عشان الله عز وجل يقول{ ليذيق بعضهم بئس بعض} . يعني ربي يسلط عليهم اللي اقوى منهم ويكونو دون عن كل الناس هما اللي بيتضررو ويجلسو يقولو اشمعنا بيت فلان العلاني مابيسرلهم زينا واشمعنا دولاك اللي مدري ايش مهم زينا بس احنا بيسرلنا كدا ليش ياربي... عشان ربي بيخفف ذنوبهم لانو رحيم يبغاهم يوصلو الآخره بأقل قدر ممكن من اشكال المعاصي اللي عندهم ومارح اكمل في الهرجا دي لعل الله يغفرلنا ويتوب علينا بس

7:
اللقافه اللي موطبيعيه ابدااا زي الكاركتير اللي في بداية الموضوع يعني بس اتجمعو على البني ادم المصدوم وجلسو يتفرجو ومحد قام عمل شي وطبعن دا يامكترو لمن تسير مضاربه ويكونو اتنين جالسين بيقتلو في بعض يجو الناس يسوو دويره حولينهم والدمان تتطرطش عليهم وهما مبسوطين يعني محد فكر يقوم يدخل يوقف الشي السخيف اللي بيحصل وتتعدد اسباب اللقافه في الحياه يعني اديكم مثال تاني يجي واحد يسأل زميلو في العمل اللي مايشوفو ولاسلم عليه غير مره في السنه ويروح يقلو هاا حكيني ايش سوو عيالك في وظايفهم وفين راحو وانتا ايش عملت في دكاكينك وجابتلك فلوس ولا ماجابتلك ..........الخ  الرسول عليه الصلاة والسلام قال (من حسن اسلام المرء تركه مالايعنيه)  في أوضح من كدا حديث؟

8:


في النهايه هادي (بعض) من تصرفات الشعب السعودي اللي انا كل ماباشوف احد يعمل وحدا منها باقول بيني وبين نفسي (شعب سعودي)وانا خصيت الشعب السعودي لاننا مجتمع واحد وانا مارح اقول خلاص هما كدا يعني ايش نعملهم؟ لاءه المفروض اذا الشي ماعجبني فرح احاول اغيرو باي شكل واتمنى كلامي دا يوصل لاكبر عدد ممكن من الناس عشان نحاول نرتقي بمجتمعنا للافضل والاحسن واموت وانا عامله شي كويس في الحياااه 


والسؤال هنا يسدح نفسو: نظريتي غلط ولا صح واذا غلط .ليش؟ واذا صح.ليش؟





Read more ...

About Me

صورتي
ARROWS
my world is just 4 me soo be ware
عرض الملف الشخصي الكامل الخاص بي

المشاركات الشائعة

Sample Text

welcom
يتم التشغيل بواسطة Blogger.
.๑. My SMS .๑. اذا الشعب يوما اراد الحياة فلابد ان يستجيب القدر

المتابعون