My Picture

welcome 2 my world

more about me , للإستفسار »

لو كنت مديرة في..




بسم الله الرحمن الرحيم


اتأسف على انتقادي الكتير لكن والله ماقصد من انتقادي اي استهزاء وماشابهو ومقصدي من انتقادي اني اكشف الاخطاء اللي الناس بيعملوها ومهم داريين وحاسين بيها
زي برنامج خواطر اتكلم عن سلبيات لاكن كشف للناس اشياء عمرهم مافكرو فيها
وقابلت شريحه كبيره من الناس تكره نوعية انتقادي ويوهمو نفسهم انو كل شي حولينهم كويس ونظيف ومايحتاج تغيير
عموما ندخل في صلب الموضوع
انا رح اتخيل نفسي في اماكن اداريه عاليه والخيال احسو من اكتر النعم اللي انعمها الله على الانسان لانو بيوصل نفسو لاشياء يتمناها واحيانا اشياء مهي على الوجود
وانا من اكبر امنياتي اكون مسؤوله عن شي في عملي وانجح فيه واحقق اللي غيري ماحققو
قبل ماأبدء في التخيل احب انصحكم انكم تتخيلو اكتر ماتقدرو عن مستقبلكم وتتخيلو نفسكم في احسن الوظائف واحسن حياة واحسن مرافق عمر
واللي قد قرء كتاب السر ويشوفو من الناحيه الاسلاميه مو الغربيه حتلاقو انو الكلام سليم 100%

عن ابي هريره رضي الله عنه قال(كان النبي صلى الله عليه وسلم يعجبه الفأل الحسن ويكره الطيرة

حدثنا ‏ ‏إسحاق ‏ ‏حدثنا ‏ ‏خالد بن عبد الله ‏ ‏عن ‏ ‏خالد ‏ ‏عن ‏ ‏عكرمة ‏ ‏عن ‏ ‏ابن عباس ‏ ‏رضي الله عنهما ‏ 
‏أن رسول الله ‏ ‏صلى الله عليه وسلم ‏ ‏دخل على رجل يعوده فقال ‏ ‏لا بأس طهور إن شاء الله فقال كلا بل حمى تفور على شيخ كبير تزوره القبور قال النبي ‏ ‏صلى الله عليه وسلم ‏ ‏فنعم إذا ‏ 
وايضا قول الرسول تفائلو بالخير تجدوه هادا كلو يرجع لقانون الجاذبيه زي ماسموه في كتاب السر اللي انصحكم بقرائته واللي يحب يحملو في لنك في اخر الموضوع
ونقطه اخيره قبل مابدء لازم اوضحها
انا رح اذكر سلبيات ورح احاول اجبلها حلول وهادا واجب كل مواطن يساعد في ادارة بلده وبالتالي نأمل التجاوب لمن هم فوق كرسي الاداره


لو كنت مديرة في وزارة التربيه والتعليم:
اولا رح انزل قرارات وهي كالآتي:
 - مسموح للطالبه او الطالب احضار الطعام من خارج المدرسه.
- مسموح عمل احتفالات بسيطه لانجازات الفصول او لتفوق دراسي وماشابه ذلك ويمنع عملها لحفلات اعياد الميلاد وماشابهها (غصبن عني عشان اكون مديره عاقله)
مع لزوم اخذ تصريح (احتفال)من مديرة\مدير المدرسه ويجب ترشيح طالبه\طالب تتحمل مسؤولية النظافه العامه والامان ومايمكن تحمله من جوانب الاحتفال.
- مسموح للبنات لبس التي شيرت بشرط موافاته شروط الحشمه (يعني مايكون باقيلو شويه ويسير عريان).
- مسموح للبنين عدم لبس الاشمغه\الغتر وهو غير الزامي.
- مسموح لبس الاحذيه المختلفه بشرط لبس الجوارب وممنوع الحضور بدون جوارب .(كلمة جوارب صح ولا؟
- الاذاعه الصباحيه ليست الزاميه كما يجب وجود مجموعة الاذاعه المختصه بجميع شؤون الاذاعه الصباحيه ويمكن للفصول المشاركه بشرط كون المشاركه فعاله وايجابيه .
- تكوين فرق للبنات وتنظيم دوري للمدرسه خاصه وبين المدارس المختلفه عامه ولزوم وجود ملعب بسيط لكرة القدم وسلة لكرة السله في كل مدرسه حكوميه للبنات .
- الآتي مسموح للطالبه احضاره معها:(مرآه،مشط،كحل اسود،مرطب شفاه) وغير ذلك فهو ممنوع ويوجد عقوبات عليه.(ياسـلام ^^)
ثانيا رح اعيد تشكيل لجنة تأليف المناهج وحاشيل نظام الكتب الجديد وابدء مع الطلبه حبه حبه (على قلبي) من اولى ابتدائي عشان ماتحصل المأساه اللي بتسير دحين مع الطلبه لانو في الحياه كلها لازم يكون الشي بالتدريج مو ناس عمرهم ماتعاملو مع الانقلش غير حبتين ويبغوهم خلاص يسيرو فلته وتسير عقولهم زي طلاب مصر ×_×
وطبعن الشي ينطبق على المدرسين\مدرسات المساكين اللي رمو في حلوقهم منهج عجيب وماعرفو يدربوهم غير في نهاية الاجازه خلاص والين دحين مازالو يتدربو وفي ناس كتير اتقاعدت من التعقيد دا



لو كنت مديرة في وزارة الكهرباء والمياه:
من اهم الاعمال اللي حتكون على قائمة اعمالي تغيير موقع تزويد الوايتات اللي في شارع المكرونه ومايحتاج اقول السبب انتو بس عدو من هناك وحتعرفو قد ايش محلو عامل زحمه ومخرب السكك وهوا اصلن شارع ياصغرو
من اهم تاني اعمالي تشكيل لجنه منظمه للصيانه الدوريه للوايتات وفرض عقوبات اذا وجد تسريب من الصمامات او خلل في الوايت لوقت طويل.
من تالت اعمالي تشكيل لجنه اخرى مسؤوله على وضع جداول مدروسه ومنظمه بحيث يكون لكل وايت مسار معين ووقت معين ومكان معين.
كما انه لابد من وجود مركز منظم لخدمة العملاء عشان لانشوف ناس يباتو على كراسي الانتظار.
وفي عمل مهم ايضا وهو تعريب السائقين يعني بدل الاجانب نقدر نحط عرب من مختلف البلدان لاني اشوف انهم اجدر بالوظيفه قبل الاجانب لانهم رح يتحملو مسؤوليه اكبر من انهم  يوصلو المياه ويعبوها وبس
 لانهم رح يتقيدو بالجدول بحذافيرو ويحاولو ينفذوه بدون اي اغلاط .
وكمان رح افعل خدمة البطاقة الالكترونيه الذكيه انا قد شفت اعلانها بس ماشفت انها اتفعلت وسارو الناس يستخدموها فــ حتكون سريعه بما يكفي عشان تلبي حاجة المواطن باسرع فرصه
وبالنسبه للكهرباء رح احاول قد ماأقدر أنسي الناس ايش يعني انقطاع كهرباء ورح اسعى اني اوصل للقرى البعيده الكهرباء قبل مااسعى على توصيلها للمخططات الجديده
ورح اراقب الموظفين واطرد كل من يتعامل بالرشاوي لانو اللي مايراقب الله في اعمالو مارح يكون عندو امانه من اصلو واحنا في حاجة الناس اللي بأمانه ومستعده اوظف واحد معاه شهادة ثانويه وأمين ولا اني اوظف واحد بشهادة جامعه ومهو امين
لانو صدقوني لو الكل كان امين في تعاملو وفي تصرفاتو كان ماكنا بدا الحال



لو كنت مديرة في امانة جدة:
امانة جدة ماانكر جهودها ولاكن تحتاج للتعديل من اليوم الين مليون سنه قدام عشان نوصل للمرحله المطلوبه
اول شي رح اغير الزبايل الله يكرمكم وزي ماشفنا في خواطر كيف الزبايل الجديده غير انها ماتستحمل كمان صغيرة وماتكفي حاجة (حي)
ورح افرض عقوبات على الموظفين رقم 2 (الزبالين) اذا اكتشف احد انهم يشحتو ورح احاول بقدر المستطاع اقوي من رواتبهم وطبعن الأحقيه للعرب المحتاجين قبل الاجانب
رح اخلي وظيفة وايت شفط المجاري للأجانب لانو العرب ليهم الافضليه في الوظائف الاحسن من كدا.

من الاعمال المهمه لامانة جدة رح احاول اكثف جهودي على المطبات والحفريات اللي سارت جدة مشتهرتبها
وفي مشروع طويل عريض وحياخد وقت لاكني متأكده لو سار حينجح بالرغم من انو في مخاوف من دا المشروع
مشروعي هوا قنوات صرف صحي وغرف كبيره يعني زي في اوروبا
لازم يكون في بنيه تحتيه مدروسه ومن المخاوف من دا العمل انو جدة على طبقه خفيفه من القشره الارضيه ودا اللي فاخر الزمان حيخليها تغرق فإنو نحفر مسافات كبيره تحت الارض حيعرض القشره لخطر
يعني المهم لازم شغلنا الشاغل يكون في كيفية بناء بنيه تحتيه سليمه ومفيده للبلد ورح افتح المجال للجميع بطرح خططو وأفكارو لبنائها
ومن الخطوات الصحيحه اللي بتقوم بيها الامانه حاليا وهي ازالة العشوائيات وهادي خطوه جريئه وقفزه كبيره زي ازالة عشوائيات حي الرويس اللي حيبدؤو فيه بعد 6 شهور زي مايقولو وانامتأكده انو حيشوفو العجب العجاب
وحتطلع الأوكار والناس اللي بدون اقامات وانشالله يكون رادع للمروجين الشهيرين في ديك المنطقه بالرغم من انهم يقدرو يلاقو مكان تاني يسكنو فيه ×_×


لو كنت مديرة في موبايلي :
موعشان شي بس عشان الشعب المسكين اللي مولاقي احد يخدمو وخدمة للمساكين الملطوعين بالساعات بانتظار احد يعطيهم وجه
يعني انا لو كنت مديرة شركة ناجحه زي كدا رح احاول اوفر اكبر قدر ممكن من الموظفين لخدمة العملاء بحيث تقل نسبة المنتظرين وتقل شتائم ودعاوي الشعب عليهم
وماعندي شي تاني اضيفو



لو كنت مديرة في مجموعة التحكم بالمراكز والانشطه على وجه الارض (وهمي):
رح اشيل شي اسمو قياس واختبار القدرات نهائيا ورح اعمل اختبارات اكثر فائده لانو في ناس بالملايين بينظلمو فدي الاختبارات والزكاء عمرو ماكان بالحساب بسرعه
ولو كان الحساب بسرعه شي مهم فعلن كان اتطورنا وارتقينا اعلى من كدا
رح اعمل اختبارات تقدر الذكاء الملموس ذكاء في التعامل وذكاء في بناء جيل وذكاء تحمل مسؤولية شركات وامور اكبر وذكاء في ايجاد حلول سريعه
او اننا نختبر الطالب اختبار القدرات تبع الرياضيات ونختبرو الاختبارات اللي ذكرتها وعلى اساسها ندخلو المجال اللي هوا يستحق يدخلو
مونقعدو في البيت ونخسر مواهب ذهبيه
ومن المستحيل اني اجمعها واخليها نسبه وحده واخليها مقياس لانو دي ابيخ حركة ممكن تتعمل (سوري عصبت


لو كنت الملك:
امزح ^^




في النهايه الكلام مايخلص والسلبيات يامكترها لاكن انشالله تنحل المشاكل في خيالي الصغير
وليكم الحريه تتخيلو كيف حتكون الحياه لمن تتطبق الاحلام دي على ارض الواقع
ولاتفرحو كتير لاني لو سرت مديرة اول بني ادم ماحيعجبني حاعلقو في السقف وحاخلي كل اللي بيشتغلو يفرشوه
بس كيف باللهي مو حتقوم القيامه ازا كنت مديرة صح؟ خخخ


رابط تحميل كتاب السر:
اضغطو هنا
يارب تستفيدو ^^




Read more ...











بسم الله الرحمن الرحيم


انا قبل ماافتح المدونه في خمسميت موضوع جا على بالي وقلت انشالله رح اكتبو
وبعد مافتحت المدونه نسيت انا ايش كنت ابغا اكتب وموضوع كاكو دا كان من ضمن الاشياء اللي نسيت اتكلم عنها
عموما بما اني افتكرتو فلازم ياخد نصيبو في النقد ^_*

كااكو وسنين من العذاب المستمر من يوم ماخشيت مدارس الحكومي فحياتي وانا ماشفت في المقصف غير كاكو
واللي عمرو مادخل مدارس حكوميه وداق طعم الجوع الناشف انا رح اعرفكم على كاكو
هادا موقعهم   http://www.gccsfp.com/kako.htm
 ولمن قريت الكزب اللي كاتبينو حسيت بلعبان كاتبين انو وجباتهم كلها متوازنه وصحيه وشهيه وانهم مرا خطيرين وجايبين مصانع ماخده اعلى الشهادات ومخازنهم توب ومرا تعبو في التوصيل بس هما شطار قدرو يتغلبو على دي المشكله
انا من ناحية انهم صارفين على النظافه والمصانع اقلهم برافو عليكم
ولاكن انو الواحد يصرف كل ميزانيتو على نضافة المصنع ومايفكر في الشي الرئيسي اللي هوا الاكل هنا حنلاقي المشكله
ومن الركب الكبيرا اللي قريتها انوعاملين عصائر طبيعيه متنوعه وعديده وهوا ماعندنا غير برتقال وتفاح من يوم ماتولدت وبعدين اشتركو مع الربيع وجابو عصيرات مشكله ياكبرها كاننا حنرضعها ماحنشرب عصير ومخلينها بريالين طيب يعني كان ممكن يشغلو المخ شويا ويجيبو الصغير عشان يناسب ميزانية البنات طبعن مو كل البنات مصروفهم اليومي 5 ريال في غلابه ومساكين يادوب ريالين او تلاته حيشتروبو عصير ابو ريالين وبريك مسخوط وعليهااا الين يرجعو بيوتهم؟
ومن ضمن الركب برضو كاتبين قائمة للأكل اللي بيصنعوه وصراحه مرا شي بايخ انهم مسويين موقع ياكبرو وكيف نشأت الشركه وكيف هما خطيرين وفي النهايه هوا كلو على بعضو 16 شي بتنتجو الشركا الكبييييرا دي
ومن ضمن ال 16 انا فحياتي ماشفتهم كلهم في المقصف تقريبا كل اللي في المقصف 6 اشياء من ال 16
ولازم تشوفو الصور اللي حاطينها عن المنتجات اترنو طلع في شي بالهوت دوق وفي كيك من حقهم وفي بزبدة الفول السوداني وفي سوبر بيتزا ودي اكبر كزبا في الحياه اظنها دي تنباع في وحده مدرسا بس وكمان مو في جده
طلعو عندهم فروع في الدمام والرياض يعني ناووين على شعب المملكه كلو
وانا اتزكر انو في مرحله حياتيه جابو في المقصف زي الصحون وكان فيها قلك تفاحه وشكلاته ومعجنات وكان عليها طلب وكانت نقدر نقول فكرتها مقبوله وعشان الطلاب عجبتهم قامو لازم ينغصو على حياتهم ويشيلووه
انا جاتني فتره سبت النواشف دي وقلت خليني اجيب اكلي من بيتي وواللهي العظيم انو وزني نقص عن اللي كان عليه كنت قد ماأقلل في اكلي لازم نواشفهم تزيد الواحد مدري كم كيلو وحاليا ليا 3 سنين باجيب اكلي من بيتي افضلي من اللي كنت عليه
وانا سمعت مره من وحده تدرس في ينبع في مدارس الهيئه الملكيه تقول انو في عدة شركات غير كاكو تتنافس على تقديم أكلها وطبعن شتااان بين الشركات دي وكاكو يعني انا متاكده انو في شركات غير كاكو لانو مستحيل المملكه محد فكر غير حقون شركة الخليج العربي
وازيدكم من الشعر بيت المقصف الرهيييب حقنا منعو فيه الشكولاته ......
وجايبين تمريه وبسكريم (هادا بسكوت بالشكلاته الكزبيه) هادا اللي عمري ماشتريتو غير لاني احتاج طاقه تمشي رجولي وكمااان مايبيعوه غير في الصرفا
يعني فهموني دحين اللي منع الشكلاته في مقصفنا مثلن مثلن يبا يفهمني انو هوا مرا مابياكل شكلاته؟؟؟؟؟؟؟
هوا انا موضوع الشكلاته دا خلاني اخرج عن طوري وامكن هوا سبب رئيسي عن كرهي للمقصف بكبرو
واظن لو دعيت دعوة مظلوم على كاكو رح تستاجب لاننا فعلن مظلومين
يارب يحقق الاسباب ويكون قفل كاكو على يدي ونجيب شي اعدل لعل وعسا تتنور العقول شويا
وموبعيد تكون كاكو هيا سبب الغباء الموطبيعي اللي بنشوفو دي اليومين

وازا كان في احد مسؤول باي طريقه عن دا الموضوع فانا اتمنى انهم يشوفو حل للي بيحصل ياانهم يقفلو كاكو او انهم يحسنو في منتجاتهم او انهم يرجعونا على سندوتشات البيض والكبده والجبنه الصفرا انا متاكده انها حتكون ألز وأبرك *_*

في النهايه اللي يشوف كلامي غلط  او صح كلي آذان صاغيه

=(

Read more ...
مـــــن هــــــوايـــــآآتـــيـــ

بسم الله الرحمن الرحيم

حبيت أعرضلكم بعض من هواياتي واللي هيا الشعر-رسم طبيعه-رسم قرافيتي-اساور بالخيوط
ولو كنت ولد كان حطيت مقاطع فيديو لباقي هواياتي ^^
 واللي يحب يعرف كل هواياتي يدخل على صفحة المعلومات الشخصيه عني




حابدء بالرسم الطبيعي وطبعن انا لسا جديده يعتبر على الرسم من اصلو لاكن الشعر انا باكتبو من ايام سادس ابتدائي وهادا الشي اخدتو من بابا لانو شاعر ماشالله ولو احد حسبلو اشعارو حيعملو دواويين لاكن مادري ليش لمن عرف اني اكتب شعر قلي :الشعراء يتبعهم الغاوون *_*





ماعلينا المهم هادا الرسم الطبيعي 





ودحين القرافتي وبرضو اعيد واكرر اني مبتدئه 





























ودي اساور الخيوط اللي اعملها
الحبه بـ 10 ريال ومافش تخفيض لاقرايب ولا غيروp:







وهنا نبدأ بالشعر وطبعا انا اكتبو بالبدوي ماعرف ليش وكمان لحد يسأل ليش كلو حزن فـ كرب وفي شي مهو شعر ولاهو خواطر ماعرف ايش يسموه *_*







رح ابدأ بآخر شي عملتو كان في شعبان بعنوان جبار خاطري



ياقلبي المسكين تكفى تناسا      انا ادري باللي سببلك جروحك
عسى ربي لايريحله مقاعد   ويتعذب على كل دمعه طاحت من عيونك
يحسب ان القلوب لعبه    ياخد كل ذرة حب فيك ويلعبه ويخونك
لاكن يجيله يوم من اسوء ايامه   ربي الديان ماينسى معبوده
كانو فيوم اعز ماعندي     كانو قريبين لاكنهم ياقلبي مايستحقونك
مو كل من في الدنيا استاهل غلاك   لأن عمرهم ماقدرو يقدرونك
لو كانو يدرون بصدقك بحبك   عمرهم ماتجرؤو يسيبونك
لو يدرون وش كثر انت صافي   كان حاولو دايم يجارونك
وآه لو يدرو بمنبع حنانك    كان سار حلمهم كل يوم يضمونك








دا بعنوان نبذه عن مسلسل عذابي









تعبت من الوحده وضاقت انفاسي
وقلبي انجرح جرح ماله تداوي
الناس تبعد وانا وحدي مع احزاني
احاول اداريها واخفيها لاكمل ايامي
الدنيا سارت حولي مثل ضلمت الليالي
اجرب انيرها بأي امل وللاسف ضاعت آمالي
بدات افقد احساسي وتتخدر اطرافي
بدات انسا شي اسمه احبابي
بدات امرض بدات اعااني
فكرت اني اودع حياتي
واروح لعالم ثاني لعل الاقي ملاذي
لعل الاقي من يحزن على حالي
ويعطف علي ويحس بآهاتي
بس لوما خوفي من غضب  الاهي
ولو ماخوفي من جحيم اسوء من جحيم ايامي
كان ماصبرت دقيقه ولا ثواني
كان سرت رماد داخل حفره في هل الاراضي
يعني فكرت بالموت ومانفع خياري
صار كل تفكيري كيف احسن اوقاتي
كيف اعيش زي اي انسان عادي
كيف امضي دقيقه بدون بكا ومآسي
حاولت وحاولت
لين تشتت افكاري
واستسلمت للمصير اللي هو امامي
في النهايه
ماقول غير الله يثبت اقدامي



ودا عنوانو بدايتو






قالو بلا حب قلتلهم مثل حبي مافي احد ثاني
وطحت في هالحب وعشت احلى أيامي
تركت كل اللي مادخل راسي
وخليت قلبي يسرح ويعيش بمزاجي
كانت احظانه وطن كانت عيونه اساسي
كان الجرح مايقدر بقلبي يعيش الثواني
كانت دموعي غريبه لو تسيل
ولو سالت اعرف إن القلب هاني
عطيته كل ماقدر من حبي و حناني  
 وفديته بروحي وحياتي
لاكن الزمن لي كان قاسي
وظروفه اقسى من الزمن
مافكرت باللي حيعيش كل  المآسي
اخذت احلى ماعندي
اخذت اللي نورلي دروبي
وبدون رحمه وقفت اخباره عني
ياحسافه على كل اللي ضاع
والله يعين الحب اللي في قلبي
يارب سلمه من أي شر تالي
واحفظه ونور له دروبه
ورجعه للي فدا عيونه ولدفاه حاني
لعل قلبي يعرفني ويلقاني






وبــــــس ^^ انشالله ماتكون الانتقادات كتيره بس انا ارحب بيها برضو
Read more ...
من درر الـ 24






بسم الله الرحمن الرحيم

اسفا على الانقطاع الطويل صراحه من يوم مابدأت الاجازه واحنا ماستقرينا
وبيت جديد ومافي خط تلفون وبالتالي مافـي مودم فانشالله تتحسن الحاله وارجع تاني
والموضوع دا بافكر فيه من ايام الاختبارات النهائيه واخيرن قررت اني اكتب عنو
الا وهي مدرستي الـ24 صراحه تستحق جدا اني اكتب عنها لانو مهما عبرت مارح اقدر اوصف قد ايش السحر اللي بيحصل فيها بالرغم اني ماعاشرتها اكتر من سنتين لاكن مرا كفايه اشوف فيها اشياء كتير

في البدايه المدرسه طبعن للمرحله الثانويه وهيا في حي الصفا
والمبنى مستأجر يعني مو حكومي وهادا من عقد حياتي وعمري مادرست في مبنى حكومي
ورح احكي كيف وصلتلها بالرغم من انها ماكانت في مخططاتي ابدا
اولا بعد ماخلصت المتوسطه التعيسه واللي بالتحديد كانت اسوء فتره فحياتي من ناحية نفسيتي ومن ناحية الناس اللي شفتهم فيها ولاني ابغالي ضرب كنت التلاته سنين اللي في المتوسطه متعرفه على شله مريضه نفسيا مايعلمبها غير ربنا وهما اللي خلو نفسيتي كانت بالشكل داك بس كانو امكن اقرب ماتوصلت اليه وكنت زي الخدامه عندهم اللي مالقت وحده تمشي معاها تجي تاخد الخدامه تمشي معاها كنت اقرب مايكون الى المهرج +خدامه
اختصار الهرجه ماكان عندي غيرهم ولمن اتخرجنا من المتوسطه طبعن لازم الخدامه تلحقهم بس انا في ديك الاجازه الفاصله بين تالته متوسط واولى ثنوي اتغيرت تغير جذري فكريا وشكليا
المهم رحت معاهم اول اسبوع في (الخرابه) لانو ديك ماتعتبر مدرسه كانت زريبه شي بطال وفيها حالات نفسيه خطره وناس بيحاولو يسيرو بويات ومهم قادرين المهم الوضع هناك كان لايطاق والمدرسه قديمه وكمان الفصل كان مطبخ وفتحة المغسله كانت كفيله اني اعترض اشد اعتراض وكنت شويه وحابكي وانا اتوسل للبابا والماما انهم يطلعوني منها
و مرا ماتوقعت انو حيخرجوني منها بس ماعرف كيف ربنا رضي عني كنت في اخر يوم في اول اسبوع دراسه وكان في داك الوقت بابا وماما بيدورو على مدرسه واللي اشترطت ليهم انها تكون مبنى حكومي بس سبحان الله اللي ربنا يقدرو دايمن خير يومها رجعت البيت وماما قالتلي في خبر حلو وخبر لاءه قالتلي اول شي انو المبنى اللي لقوه مستأجر بس المدرسه كبيره وشرحه وانا جيه من الخرابه ديك فاي شي حيكون ارحم
واول مادخلت ال 24 الساحه غير تماما عن البؤس اللي كنت فيه ولمن دخلت الفصل كان فعيني من اروع مادخلت طبعن لو احد جي من مدرسة اهليه حيقول ايش القرف دا بس بالنسبالي انا شفتو حته من الجنه وكان من اشد احلامي بعدا انو يكون فصل كبير وفيه شباك مهم حاطين عليه تجليد اسود يعني باشوف شمس ربنا فيه وكانو صراحه متعبين نفسهم وعاملين شويه حركات وضاربين الجدران بالوان غير يعني حاولو فيها
والمدرسه فيها فصل للإنقلش مرا يفتح النفس وفيها مكتبه جيده ومعمل فيزيا ومعمل كيميا وفصل الاحياء وفصل الفني ومعمل الحاسب
وكلهم منتشرين في المبنى وهوا 3 ادوار وطبعن بما اني احب المغامرات اكتشفت السطوح والمزاكره فيه تفتح النفس مررا
من ناحية الابلات هنا السحر لانهم نخبه من اروع ماشفت من الابلات من ناحية التعامل ومن ناحية الشرح واصلن انا اول مره فعمري تطلع نسبتي التسعينيات في هادي المدرسه والجدير بالذكر اولى ثنوي الصعبه المميته جبت فيها اول نسبه عدله فحياتي وطبعن نسبتي الحمدلله بتزيد كل مافهمت الابلات اكتر
ومن الاشياء السحريه كمان (المديره) لاني شفت عدد لابأس به من المديرات في حياتي وكلهم ابغالهم حرق بغاز
بس دي ماشالله اروع تعامل واروع اداره بس مهي طيبه مره يعني ابغالها انتباه شويه لاكن سيدة رقبة المديرات كلهم
وبرضو من السحر في دي المدرسه انو ربي مسلمها من البنات الشرادح والماصخين واللي يبغالهم ضرب واللي ماتربو وبالتالي لمن مايكونو في دول الفئه من الناس يقوم يبقى عدد قليل هما الكويسين ودا الشي في مدرستي حاصل والبنات عددهم مو كتير يعني احد ينزل الساحه في الفسحه مسلن بالرغم من انو العالم قاعده بس ماتسمعو غير همس وازا زعقت وحدا ولا احد ضحك خير وبركه ونفس الشي في اسياب المدرسه بس اللي تحب تزعق وتفضفض تاخد راحتها ولاكن رح تتهزأ زيي وانا هادا اكتر مايعجبني فيها لاني احب استرخي ماحب الازعاج
ومن الجدير  بالذكر انو معمل الحاسب غيروه يعني لمن حنرجع حيكونو خلصو منو وجابو شاشات مسطحه وكمبيوترات عدله بدل داك القديم اللي تتحط شاشتو فوق الجهاز
والشارع اللي يحيط بالمدرسه فيه بقاله تكفي بالغرض والحاره تقريبا راقيه ونصها فلل واحنا وسطها عشان كدا محد يدري عن المدرسه
فالحمدلله على كل حال ربنا عوضني فيها بأعز صحبات وناس يستحقو الوحده تضحي عشانهم =)

اللي بتدور على مدرسه عدله تروح الـ 24
واللي يبغا الدح مايقول .... أح




Read more ...

About Me

صورتي
ARROWS
my world is just 4 me soo be ware
عرض الملف الشخصي الكامل الخاص بي

المشاركات الشائعة

Sample Text

welcom
يتم التشغيل بواسطة Blogger.
.๑. My SMS .๑. اذا الشعب يوما اراد الحياة فلابد ان يستجيب القدر

المتابعون