My Picture

welcome 2 my world

more about me , للإستفسار »

المرأه خلف المقود













منال الشريف...ايش عملتي ؟

مدونتي العزيزا وحشتني فحبيت اقرقر فيها شويه

وانا كل شي ليا وجهة نظر له لاكن بالذات مسألة قيادة المرأة للسياره خلتني اسكت واتنح كتير

وانا محور تركيزي واهتمامي وتتنيحي كلو على (جا الوقت اللي نسوق فيه ولا لسا؟)

لانو مستحيل ولحد يجي يقول انو المراه ابدا مارح تسوق في السعوديه

والكل عارف وحاسس انو المراه حتسوق ولو بعد حين

وكل شي بيتغير حوليينا غصبا عننا

يعني قبل 20 سنه ماكان كشف الوجه عادي وطبيعي زي مادحين سار

وقبل 20 سنه ماكانت وظيفة المرأه مطلوبه زي دحين

وقبل 20 سنه ماكان للمرأه الا بيت زوجها واللي تقول غير كدا كانت شاذه

بالتالي كل شي بيتغير تغيير جذري وحبه حبه على قلبي بيسير عااادي

 ورب البيت نفسو بتتغير طريقة تفكيرو ونظرتو لتربية اولادو

ونفس الشي حيسير مع السواقه والكل حيتعود وحتنفرض قوانين وحدود محد يتجاوزها

لمن يجو يقولو المرأه ماينفع تسوق السياره ..ليش؟

يقولو عشان لوبنشرت السياره ايش حتعمل؟ 

طيب لي هادي المشاكل ماحتسير الا لمن تكون بتسوق

مو هيا بتروح أي مكان وهيا على رجولها بتتعرض للتحرشات
 والمضايقات ومشاكل ممكن تكون اكبر بمليون مره من بنشرت سيارتها

ولمن تكون مع السواق اوووه حدث ولاحرج يعني لو ماسلمت من السواق ماحتسلم من اللي برا

يعني ياجماعا مهما لفينا ودرنا سواقة المرأه موهيا الشي الوحيد اللي ينطبق تحت مسمى (سدا للذرائع)

ماحقدر اقول لو كل رجل سعودي  غصب بناتو انهم مايدرسو برا وانهم مايكشفو وجههم وانهم ينعزلو على مجتمعهم
حيفيدهم

لانو احنا مع مرور الزمن غصبا عننا بنتغير مافي شي يستمر على حالو

والانفتاح رح يستمر بكل صورو واشكالو دامت اننا حنسير دول كبرى ومجتمعات عظيمه

الشي الوحيد اللي ممكن يحفظ الناس من الانحراف هوا دينهم

يعني لو كل واحد ساق سيارتو وهوا محترم نفسو ومتأكد انو الله شايفو وبيحاسبو كان ماخفنا على أحد

و لو طبقنا ديننا صح مارح تكون قيادة المرأه قضيه مشيبه راسنا ومحنا عارفين نحلها

الانسان الواعي الفاهم هوا اللي يقدر يواكب التطور بس ماينسى دينو

فوووق دا لو ماننسى الآيه الكريمه {وقرن في بيوتكن ولاتبرجن تبرج الجاهلية الاولى}

الآيه صريحه وواضحه البيت بدون المرأه ولا شي بالذات الأم

ولو جينا نربط الآيه بقيادة السياره حتكون قيادتها للسياره مو على طول فقط اوقات الضروره

واوقات الضروره يعني مستشفى او موت او مصيبه ...

ولا تبرجن يعني وجه مغسول لانو اللي تجي تتزبط وبعدين تقول فلان آزاني تستاهل الين ماتتوب وتبطل

فحيجي يوم وتقود المرأه السياره لاكن مو بالطريقه اللي عملتها منال الشريف

انتي منتي في غابه عشان حكم القوي على الضعيف هوا اللي يمشي

هادا قرار مايسير الا بالاجماع ومارح تبيضي لو استنيتي شوييه (سوري)

المشكله انو بعد ماعتقلوها قالت روحو حاسبو اللي حرضوني على دا الشي

وهما كم نفره عايشين برا المملكه وصراحه الكلام دا ممكن يكون صح ليش لا

لاكن اننا نجي نسوي زي لمن فصخو الحجاب في مصر وحرقوه
ماينفع
لو ربي اردلنا نسوق حنسوق لاكن مافي شي اسمو المرأه الخارقه اللي رح تقهر الرجال وتكسر كلمتهم

اوكي مررررا نقدر نسويها

بس في شي اسمو طاعة ولي الامر اللي اتكلمت عليها في موضوع حسني وسيول جدة


الحل هوا الصبر وانشالله مانسوق الا لمن كل الادمغه اللي حوليننا تتنور

ونخرج بسياراتنا وحوليننا ناس مثقفين فاهمين

ويكونو كلهم بطلو السواقه العشوائيه المرعبه اللي فشوارعنا وتكون الشوارع بدون مطبات وحفر
ويكونو في بنشريات

دا اللي كان نفسي اقولو بس =)
(انا مؤيده لقيادة المرأه بس مو دحين )








Read more ...
مصر ومبارك ×_× جدة والسيول





اليوم متضايقه وجي في نفسي اهرج عن اللي بيحصل حوليا
فـــا كالعاده احب اتفلسف وهاكزا



حابدأ بهرجة مصر




انا من المعارضين لحكم محمد حسني مبارك والسبب لانو ماقدر يوصل شعبو لمستوى مادي مطلوب




غير كدا انو بيرشح نفسو في الانتخابات كل شويه 




ولاكن بالرغم من معارضتي ليه فأنا محترمتو 




لانو مصر دايما ماكانت تحت عيوون الطامعين فيها




وهوا قدر انو يكون مصالح مشتركه وكون علاقات ممتازه مع الدول واقلها كان في نوع من الامان 




وفي نقطه تانيه للشعب المصري المسلم




كل المسلمين يعرفو منهجيتنا في اتباع اولي ولو كان جبار ومستبد




فااا يعني مصر دي ممكن تنسخط فأي دقيقه




لانها اولا اعترضت على الرئيس وتانيا شتموه باقزر الشتائم 




وانا اقول لكل من سبوه علنا وبدون مايستحي على وجهو عذرا انتا ماتربيت مزبوط




فمهما كان غضبنا وتعصيبنا عليه مافي آيه وحده تقول انو للشعب الاحقيه الغضب والثوره بدا الشكل وكمان 

الشتم



حقهم دول اللي ماتربو انهم يعيشو في نيجيريا ولا الدول اللي جنبها عشان يعرفو يعني ايش يحمدو ربهم




لو الناس تحمد ربها كان ماسرلها كدا الله تعالى يقول {((وَإِذْ تَأَذَّنَ رَبُّكُمْ لَئِنْ شَكَرْتُمْ لَأَزِيدَنَّكُمْ ))}




ونخرج عن اطار مصر ونروح (عذرا) للسخيفين اللي بيتظاهرو في التحليه




الآيه تنطبق عليهم برضو 




يعني انا اشوف ممكن يحتج اللي بزرتو ماتت وكمااان ماعطولو تعويض




اما اللي كنبها غرق وجيه تقول ((الـــــله اكبر)) ومسويه نفسها ولاأكبر رجال في البلد




هادي لو قعدت فبيتها كان ابركلها بمليووووووون مره والله




وبعدين ياناس مانحمد ربنا




احنا شعب مبعوووووووج بس محنا حاسيين بالنعمه اللي احنا فيها




ياناس بكفايه انو العيش حقنا مافيه تراب زي حق مصر 




بكفايه انو الشعب افقر سعودي بيقدر يجيب ال 10 ريال ويشتريبها رز ودجاج




والله غيرنا مو لاقي عيش ناشف في الزبايل




بكفايه اننا بنام بدون مانخاف من صواريخ تدمرنا واحنا جوة بيوتنا




بكفايه الكل يعرف يقرا ويكتب وبكفايه الكل معاه جوال 




بكفااية الخمر محرم وممنوع دخولو في بلدنا وبكفاية الحرمين الشريفين عندنا




بكفاية انو احنا مملكه واللهي الدوله اول ماتسير جمهوريه تتبهدل وعيونكم شايفه




لو اقدر لبكرا ازكر الناس بالنعم اللي احنا عايشين فيها ماحيحس غير اللي عندو قلب




ياناس لازم نحمد ربي سواء في خير او في شر 




لازم نذكر الله كمان لانو الظاهر بعض الناس لمن الشيطان يمسك على مخهم المتحجر بيعملو اشياء مهم قدها




وانا نفسي اوصل شي لكل اللي عملو مظاهرات في التحليه




حيجي اليوم اللي تحسو فيه بنعمة هادي البلد وحتتمنو تعيشو ولو طول عمركم وسط السيول

فوق هادا كلو انا ماأنفي وجود تقصير من جهات مسؤوله
وماأنفي اننا نحتاج بلاعه



احس نفسي اصقع العرب كلهم وانا كمان >.<




Read more ...
لو كنت مديرة في..




بسم الله الرحمن الرحيم


اتأسف على انتقادي الكتير لكن والله ماقصد من انتقادي اي استهزاء وماشابهو ومقصدي من انتقادي اني اكشف الاخطاء اللي الناس بيعملوها ومهم داريين وحاسين بيها
زي برنامج خواطر اتكلم عن سلبيات لاكن كشف للناس اشياء عمرهم مافكرو فيها
وقابلت شريحه كبيره من الناس تكره نوعية انتقادي ويوهمو نفسهم انو كل شي حولينهم كويس ونظيف ومايحتاج تغيير
عموما ندخل في صلب الموضوع
انا رح اتخيل نفسي في اماكن اداريه عاليه والخيال احسو من اكتر النعم اللي انعمها الله على الانسان لانو بيوصل نفسو لاشياء يتمناها واحيانا اشياء مهي على الوجود
وانا من اكبر امنياتي اكون مسؤوله عن شي في عملي وانجح فيه واحقق اللي غيري ماحققو
قبل ماأبدء في التخيل احب انصحكم انكم تتخيلو اكتر ماتقدرو عن مستقبلكم وتتخيلو نفسكم في احسن الوظائف واحسن حياة واحسن مرافق عمر
واللي قد قرء كتاب السر ويشوفو من الناحيه الاسلاميه مو الغربيه حتلاقو انو الكلام سليم 100%

عن ابي هريره رضي الله عنه قال(كان النبي صلى الله عليه وسلم يعجبه الفأل الحسن ويكره الطيرة

حدثنا ‏ ‏إسحاق ‏ ‏حدثنا ‏ ‏خالد بن عبد الله ‏ ‏عن ‏ ‏خالد ‏ ‏عن ‏ ‏عكرمة ‏ ‏عن ‏ ‏ابن عباس ‏ ‏رضي الله عنهما ‏ 
‏أن رسول الله ‏ ‏صلى الله عليه وسلم ‏ ‏دخل على رجل يعوده فقال ‏ ‏لا بأس طهور إن شاء الله فقال كلا بل حمى تفور على شيخ كبير تزوره القبور قال النبي ‏ ‏صلى الله عليه وسلم ‏ ‏فنعم إذا ‏ 
وايضا قول الرسول تفائلو بالخير تجدوه هادا كلو يرجع لقانون الجاذبيه زي ماسموه في كتاب السر اللي انصحكم بقرائته واللي يحب يحملو في لنك في اخر الموضوع
ونقطه اخيره قبل مابدء لازم اوضحها
انا رح اذكر سلبيات ورح احاول اجبلها حلول وهادا واجب كل مواطن يساعد في ادارة بلده وبالتالي نأمل التجاوب لمن هم فوق كرسي الاداره


لو كنت مديرة في وزارة التربيه والتعليم:
اولا رح انزل قرارات وهي كالآتي:
 - مسموح للطالبه او الطالب احضار الطعام من خارج المدرسه.
- مسموح عمل احتفالات بسيطه لانجازات الفصول او لتفوق دراسي وماشابه ذلك ويمنع عملها لحفلات اعياد الميلاد وماشابهها (غصبن عني عشان اكون مديره عاقله)
مع لزوم اخذ تصريح (احتفال)من مديرة\مدير المدرسه ويجب ترشيح طالبه\طالب تتحمل مسؤولية النظافه العامه والامان ومايمكن تحمله من جوانب الاحتفال.
- مسموح للبنات لبس التي شيرت بشرط موافاته شروط الحشمه (يعني مايكون باقيلو شويه ويسير عريان).
- مسموح للبنين عدم لبس الاشمغه\الغتر وهو غير الزامي.
- مسموح لبس الاحذيه المختلفه بشرط لبس الجوارب وممنوع الحضور بدون جوارب .(كلمة جوارب صح ولا؟
- الاذاعه الصباحيه ليست الزاميه كما يجب وجود مجموعة الاذاعه المختصه بجميع شؤون الاذاعه الصباحيه ويمكن للفصول المشاركه بشرط كون المشاركه فعاله وايجابيه .
- تكوين فرق للبنات وتنظيم دوري للمدرسه خاصه وبين المدارس المختلفه عامه ولزوم وجود ملعب بسيط لكرة القدم وسلة لكرة السله في كل مدرسه حكوميه للبنات .
- الآتي مسموح للطالبه احضاره معها:(مرآه،مشط،كحل اسود،مرطب شفاه) وغير ذلك فهو ممنوع ويوجد عقوبات عليه.(ياسـلام ^^)
ثانيا رح اعيد تشكيل لجنة تأليف المناهج وحاشيل نظام الكتب الجديد وابدء مع الطلبه حبه حبه (على قلبي) من اولى ابتدائي عشان ماتحصل المأساه اللي بتسير دحين مع الطلبه لانو في الحياه كلها لازم يكون الشي بالتدريج مو ناس عمرهم ماتعاملو مع الانقلش غير حبتين ويبغوهم خلاص يسيرو فلته وتسير عقولهم زي طلاب مصر ×_×
وطبعن الشي ينطبق على المدرسين\مدرسات المساكين اللي رمو في حلوقهم منهج عجيب وماعرفو يدربوهم غير في نهاية الاجازه خلاص والين دحين مازالو يتدربو وفي ناس كتير اتقاعدت من التعقيد دا



لو كنت مديرة في وزارة الكهرباء والمياه:
من اهم الاعمال اللي حتكون على قائمة اعمالي تغيير موقع تزويد الوايتات اللي في شارع المكرونه ومايحتاج اقول السبب انتو بس عدو من هناك وحتعرفو قد ايش محلو عامل زحمه ومخرب السكك وهوا اصلن شارع ياصغرو
من اهم تاني اعمالي تشكيل لجنه منظمه للصيانه الدوريه للوايتات وفرض عقوبات اذا وجد تسريب من الصمامات او خلل في الوايت لوقت طويل.
من تالت اعمالي تشكيل لجنه اخرى مسؤوله على وضع جداول مدروسه ومنظمه بحيث يكون لكل وايت مسار معين ووقت معين ومكان معين.
كما انه لابد من وجود مركز منظم لخدمة العملاء عشان لانشوف ناس يباتو على كراسي الانتظار.
وفي عمل مهم ايضا وهو تعريب السائقين يعني بدل الاجانب نقدر نحط عرب من مختلف البلدان لاني اشوف انهم اجدر بالوظيفه قبل الاجانب لانهم رح يتحملو مسؤوليه اكبر من انهم  يوصلو المياه ويعبوها وبس
 لانهم رح يتقيدو بالجدول بحذافيرو ويحاولو ينفذوه بدون اي اغلاط .
وكمان رح افعل خدمة البطاقة الالكترونيه الذكيه انا قد شفت اعلانها بس ماشفت انها اتفعلت وسارو الناس يستخدموها فــ حتكون سريعه بما يكفي عشان تلبي حاجة المواطن باسرع فرصه
وبالنسبه للكهرباء رح احاول قد ماأقدر أنسي الناس ايش يعني انقطاع كهرباء ورح اسعى اني اوصل للقرى البعيده الكهرباء قبل مااسعى على توصيلها للمخططات الجديده
ورح اراقب الموظفين واطرد كل من يتعامل بالرشاوي لانو اللي مايراقب الله في اعمالو مارح يكون عندو امانه من اصلو واحنا في حاجة الناس اللي بأمانه ومستعده اوظف واحد معاه شهادة ثانويه وأمين ولا اني اوظف واحد بشهادة جامعه ومهو امين
لانو صدقوني لو الكل كان امين في تعاملو وفي تصرفاتو كان ماكنا بدا الحال



لو كنت مديرة في امانة جدة:
امانة جدة ماانكر جهودها ولاكن تحتاج للتعديل من اليوم الين مليون سنه قدام عشان نوصل للمرحله المطلوبه
اول شي رح اغير الزبايل الله يكرمكم وزي ماشفنا في خواطر كيف الزبايل الجديده غير انها ماتستحمل كمان صغيرة وماتكفي حاجة (حي)
ورح افرض عقوبات على الموظفين رقم 2 (الزبالين) اذا اكتشف احد انهم يشحتو ورح احاول بقدر المستطاع اقوي من رواتبهم وطبعن الأحقيه للعرب المحتاجين قبل الاجانب
رح اخلي وظيفة وايت شفط المجاري للأجانب لانو العرب ليهم الافضليه في الوظائف الاحسن من كدا.

من الاعمال المهمه لامانة جدة رح احاول اكثف جهودي على المطبات والحفريات اللي سارت جدة مشتهرتبها
وفي مشروع طويل عريض وحياخد وقت لاكني متأكده لو سار حينجح بالرغم من انو في مخاوف من دا المشروع
مشروعي هوا قنوات صرف صحي وغرف كبيره يعني زي في اوروبا
لازم يكون في بنيه تحتيه مدروسه ومن المخاوف من دا العمل انو جدة على طبقه خفيفه من القشره الارضيه ودا اللي فاخر الزمان حيخليها تغرق فإنو نحفر مسافات كبيره تحت الارض حيعرض القشره لخطر
يعني المهم لازم شغلنا الشاغل يكون في كيفية بناء بنيه تحتيه سليمه ومفيده للبلد ورح افتح المجال للجميع بطرح خططو وأفكارو لبنائها
ومن الخطوات الصحيحه اللي بتقوم بيها الامانه حاليا وهي ازالة العشوائيات وهادي خطوه جريئه وقفزه كبيره زي ازالة عشوائيات حي الرويس اللي حيبدؤو فيه بعد 6 شهور زي مايقولو وانامتأكده انو حيشوفو العجب العجاب
وحتطلع الأوكار والناس اللي بدون اقامات وانشالله يكون رادع للمروجين الشهيرين في ديك المنطقه بالرغم من انهم يقدرو يلاقو مكان تاني يسكنو فيه ×_×


لو كنت مديرة في موبايلي :
موعشان شي بس عشان الشعب المسكين اللي مولاقي احد يخدمو وخدمة للمساكين الملطوعين بالساعات بانتظار احد يعطيهم وجه
يعني انا لو كنت مديرة شركة ناجحه زي كدا رح احاول اوفر اكبر قدر ممكن من الموظفين لخدمة العملاء بحيث تقل نسبة المنتظرين وتقل شتائم ودعاوي الشعب عليهم
وماعندي شي تاني اضيفو



لو كنت مديرة في مجموعة التحكم بالمراكز والانشطه على وجه الارض (وهمي):
رح اشيل شي اسمو قياس واختبار القدرات نهائيا ورح اعمل اختبارات اكثر فائده لانو في ناس بالملايين بينظلمو فدي الاختبارات والزكاء عمرو ماكان بالحساب بسرعه
ولو كان الحساب بسرعه شي مهم فعلن كان اتطورنا وارتقينا اعلى من كدا
رح اعمل اختبارات تقدر الذكاء الملموس ذكاء في التعامل وذكاء في بناء جيل وذكاء تحمل مسؤولية شركات وامور اكبر وذكاء في ايجاد حلول سريعه
او اننا نختبر الطالب اختبار القدرات تبع الرياضيات ونختبرو الاختبارات اللي ذكرتها وعلى اساسها ندخلو المجال اللي هوا يستحق يدخلو
مونقعدو في البيت ونخسر مواهب ذهبيه
ومن المستحيل اني اجمعها واخليها نسبه وحده واخليها مقياس لانو دي ابيخ حركة ممكن تتعمل (سوري عصبت


لو كنت الملك:
امزح ^^




في النهايه الكلام مايخلص والسلبيات يامكترها لاكن انشالله تنحل المشاكل في خيالي الصغير
وليكم الحريه تتخيلو كيف حتكون الحياه لمن تتطبق الاحلام دي على ارض الواقع
ولاتفرحو كتير لاني لو سرت مديرة اول بني ادم ماحيعجبني حاعلقو في السقف وحاخلي كل اللي بيشتغلو يفرشوه
بس كيف باللهي مو حتقوم القيامه ازا كنت مديرة صح؟ خخخ


رابط تحميل كتاب السر:
اضغطو هنا
يارب تستفيدو ^^




Read more ...











بسم الله الرحمن الرحيم


انا قبل ماافتح المدونه في خمسميت موضوع جا على بالي وقلت انشالله رح اكتبو
وبعد مافتحت المدونه نسيت انا ايش كنت ابغا اكتب وموضوع كاكو دا كان من ضمن الاشياء اللي نسيت اتكلم عنها
عموما بما اني افتكرتو فلازم ياخد نصيبو في النقد ^_*

كااكو وسنين من العذاب المستمر من يوم ماخشيت مدارس الحكومي فحياتي وانا ماشفت في المقصف غير كاكو
واللي عمرو مادخل مدارس حكوميه وداق طعم الجوع الناشف انا رح اعرفكم على كاكو
هادا موقعهم   http://www.gccsfp.com/kako.htm
 ولمن قريت الكزب اللي كاتبينو حسيت بلعبان كاتبين انو وجباتهم كلها متوازنه وصحيه وشهيه وانهم مرا خطيرين وجايبين مصانع ماخده اعلى الشهادات ومخازنهم توب ومرا تعبو في التوصيل بس هما شطار قدرو يتغلبو على دي المشكله
انا من ناحية انهم صارفين على النظافه والمصانع اقلهم برافو عليكم
ولاكن انو الواحد يصرف كل ميزانيتو على نضافة المصنع ومايفكر في الشي الرئيسي اللي هوا الاكل هنا حنلاقي المشكله
ومن الركب الكبيرا اللي قريتها انوعاملين عصائر طبيعيه متنوعه وعديده وهوا ماعندنا غير برتقال وتفاح من يوم ماتولدت وبعدين اشتركو مع الربيع وجابو عصيرات مشكله ياكبرها كاننا حنرضعها ماحنشرب عصير ومخلينها بريالين طيب يعني كان ممكن يشغلو المخ شويا ويجيبو الصغير عشان يناسب ميزانية البنات طبعن مو كل البنات مصروفهم اليومي 5 ريال في غلابه ومساكين يادوب ريالين او تلاته حيشتروبو عصير ابو ريالين وبريك مسخوط وعليهااا الين يرجعو بيوتهم؟
ومن ضمن الركب برضو كاتبين قائمة للأكل اللي بيصنعوه وصراحه مرا شي بايخ انهم مسويين موقع ياكبرو وكيف نشأت الشركه وكيف هما خطيرين وفي النهايه هوا كلو على بعضو 16 شي بتنتجو الشركا الكبييييرا دي
ومن ضمن ال 16 انا فحياتي ماشفتهم كلهم في المقصف تقريبا كل اللي في المقصف 6 اشياء من ال 16
ولازم تشوفو الصور اللي حاطينها عن المنتجات اترنو طلع في شي بالهوت دوق وفي كيك من حقهم وفي بزبدة الفول السوداني وفي سوبر بيتزا ودي اكبر كزبا في الحياه اظنها دي تنباع في وحده مدرسا بس وكمان مو في جده
طلعو عندهم فروع في الدمام والرياض يعني ناووين على شعب المملكه كلو
وانا اتزكر انو في مرحله حياتيه جابو في المقصف زي الصحون وكان فيها قلك تفاحه وشكلاته ومعجنات وكان عليها طلب وكانت نقدر نقول فكرتها مقبوله وعشان الطلاب عجبتهم قامو لازم ينغصو على حياتهم ويشيلووه
انا جاتني فتره سبت النواشف دي وقلت خليني اجيب اكلي من بيتي وواللهي العظيم انو وزني نقص عن اللي كان عليه كنت قد ماأقلل في اكلي لازم نواشفهم تزيد الواحد مدري كم كيلو وحاليا ليا 3 سنين باجيب اكلي من بيتي افضلي من اللي كنت عليه
وانا سمعت مره من وحده تدرس في ينبع في مدارس الهيئه الملكيه تقول انو في عدة شركات غير كاكو تتنافس على تقديم أكلها وطبعن شتااان بين الشركات دي وكاكو يعني انا متاكده انو في شركات غير كاكو لانو مستحيل المملكه محد فكر غير حقون شركة الخليج العربي
وازيدكم من الشعر بيت المقصف الرهيييب حقنا منعو فيه الشكولاته ......
وجايبين تمريه وبسكريم (هادا بسكوت بالشكلاته الكزبيه) هادا اللي عمري ماشتريتو غير لاني احتاج طاقه تمشي رجولي وكمااان مايبيعوه غير في الصرفا
يعني فهموني دحين اللي منع الشكلاته في مقصفنا مثلن مثلن يبا يفهمني انو هوا مرا مابياكل شكلاته؟؟؟؟؟؟؟
هوا انا موضوع الشكلاته دا خلاني اخرج عن طوري وامكن هوا سبب رئيسي عن كرهي للمقصف بكبرو
واظن لو دعيت دعوة مظلوم على كاكو رح تستاجب لاننا فعلن مظلومين
يارب يحقق الاسباب ويكون قفل كاكو على يدي ونجيب شي اعدل لعل وعسا تتنور العقول شويا
وموبعيد تكون كاكو هيا سبب الغباء الموطبيعي اللي بنشوفو دي اليومين

وازا كان في احد مسؤول باي طريقه عن دا الموضوع فانا اتمنى انهم يشوفو حل للي بيحصل ياانهم يقفلو كاكو او انهم يحسنو في منتجاتهم او انهم يرجعونا على سندوتشات البيض والكبده والجبنه الصفرا انا متاكده انها حتكون ألز وأبرك *_*

في النهايه اللي يشوف كلامي غلط  او صح كلي آذان صاغيه

=(

Read more ...

3alm mn e5tyare

enjoy

About Me

صورتي
ARROWS
my world is just 4 me soo be ware
عرض الملف الشخصي الكامل الخاص بي

المشاركات الشائعة

Sample Text

welcom
يتم التشغيل بواسطة Blogger.
.๑. My SMS .๑. اذا الشعب يوما اراد الحياة فلابد ان يستجيب القدر

المتابعون